gestern woas wiedermoi soweit - mei 6-jähriges jubiläum bei der firma.
friara is jedes joa a nettes e-mail vom chef kem, der si für den einsatz usw. bedonkt hot - nit das i des brauchat, owa nett woas scho imma und du host gwusst, das si di nit vogessn hom.
wos woa gestern? nix!
koa e-mail, koa donksche, nix - owa wie gsogt, i brauch des eh nit.
trotzdem frogt ma se noch 6 joa im gleichen job - wos kunntats ondares mochn? wos muast vaändern, dast da nit jedn tog in da fria won da wecka leit denkst - hagoxfixnuamoi, jetzt muas i scho wieder in de sch... oawat und mi mit de deppatn kundn oweärgern.
seit 6 joa hot se an dem zuastond soguat wie nix vaändert.
guat, keine frage, i hob mi persönlich sicherlich weiterentwicklt, hob vü dazuaglernt, owa des sicher nit oawatsmäßig, sondern weil i im privatn bereich ziemlich vü oage zeitn hinter mir hob, d.h. 3 von de letztn 6 joa woas sowos von hoat, das i echt auf de gonzn erfoarungen verzichtn kinnt, de i do gmocht hob.
und genau wegn de 3 joa hob i mi beruflich nit umschaun kinnt bzw. konn ma jetzt a weiterbildung oder sowos in der oat leider nit leistn und genau deshoib sitz i a nu in der hockn umadum und schau das di zeit vergeht!

wenn i auf d´nocht im bett lieg und nit schlofn konn frog i mi oft wos warat wenn! wos mochat i weiter wenn mi di firma jetzt aussischmeissat?
seit kurzem woas i wos i moch wenns soweit is: i werd ma an großn traum erfüllen und schaun, das mei lebn wieder in geregelten bahnen verläuft, schaun, das i mei lebn wieder genießn konn und das i soweit kim, das i in da fria munter wia und mi drüber gfrein kon...
schaun, das i mein kopf frei kriag, schaun, das mi der gedanke on di vergangenheit nimma zur verzweiflung treibt, schaun das i weider so werd wie i moi woa!
mittlerweile kim i einfoch zu dem schluss, das ma nua oa lebn hot und des so lebn soi wia mas für richtig hoit.
wos hob i davon, wenn i mi mei lebtog oweärger, nur schau das i gnuag geld spoa damit i ma irgendwonn moi wos leistn kon? nix! s´lebn soitat ma jedn tog so lebn wies oan spaß mocht, es konn jederzeit vorbei sei und wos host donn davon, dast geld aufn spoabuach host? wieder nix!
owa leider is es hoit so - ohne göd ka musi!
des hoast für mi: woatn biss mi aussischmeissn, obfertigung kassieren, auto verkaufn, wohnung ausrama, konten und noch vorhandene spoabiacha plündern und auf in a aufregenderes neues lebn! auf in a stodt in der i mi wohl fühl, in der i lebn mecht, in der i glücklich bin!
wöche des is? des woas i scho gonz genau!